Ընթացիկ տարվա Մայիսի 14-ից 15-ը Լեհաստանի Կրակով քաղաքում կայացավ Միկրոֆինանսավորման կենտրոնի (ՄՖԿ) 26-րդ ամենամյա կոնֆերանսը, որին ի թիվս ՀՀ-ից անդամակցող 11 կառույցների, մասնակցում էր նաև ՄՖԿ անդամ ‹‹Ֆարմ Կրեդիտ Արմենիա›› վարկային կոոպերատիվը:

Կոնֆերանսի առաջին օրը տեղի ունեցավ ՄՖԿ Խորհրդի անդամների ընտրություն, որտեղ ‹‹Ֆարմ Կրեդիտ Արմենիա›› վարկային կոոպերատիվի Գլխավոր Գործադիր տնօրեն Արմեն Գաբրիելյանը ընտրվեց Խորհրդի անդամ:

ՄՖԿ-ն ապահովում է դեպի հաճախորդ միտված և պատասխանատու ֆինանսական միջնորդության ռազմավարական ծրագրերի իրականացումը: ՄՖԿ առաքելությունն է նպաստել աղքատության կրճատմանը և մարդկային ներուժի զարգացմանը՝ ստեղծելով միկրոֆինանսավորման սոցիալական ուղղվածություն ունեցող և կայուն ոլորտ, որը խելամիտ ֆինանսական և ոչ ֆինանսական ծառայություններ է մատուցում միկրո-ձեռնարկատերերի լայն զանգվածներին:

Արմեն Գաբրիելյանը իր խոսքում նշեց, որ իր ներկայացվածությունը խորհրդում հնարավորություն կտա կենտրոնացնել ջանքերը ՄՖԿ հարթակի միջոցով դեպի մեր տարածաշրջան և Միջին Ասիա նոր ներդրումներ ներգրավվելու և այս երկու տարածաշրջանների տնտեսական զարգացմանը նոր զարկ տալու համար:

Կենտրոնը միավորում է Կենտրոնական Եվրոպայի և Ասիայի 36 երկրներից 140 կազմակերպություն, որոնցից կոնֆերանսին ներկա էին ավելի քան 400 մասնակից:

Նշենք նաև, որ սույն թվականի Ապրիլի 18-ին տեղի է ունեցել ՀՀ Վարկային Կազմակերպությունների Ասոցացիայի Ընդհանուր Տարեկան նիստը, որտեղ ՀՀ ՎԿԱ Նախագահ միաձայն ընտրվեց ‹‹Ֆարմ Կրեդիտ Արմենիա›› ՈՒՎԿ ԱԿ Գլխավոր Գործադիր տնօրեն Արմեն Գաբրիելյանը։